گزشتہ دور حکومت میں صوبہ بلوچستان کی حکومت نے ایک کینیڈین ۔چلین جوائنٹ وینچر کمپنی کے ساتھ 40 ارب ڈالر کا ایک معاہدہ کیا جس کے تحت یہ بین الاقوامی کمپنی بلوچستان میں موجود تانبے اور سونے کے ذخائر کی تلاش شروع کرکے 30 سال تک ملک کو خام مال کی شکل میں ایکسپورٹ کرسکے گی جبکہ سابق وزیر خزانہ شوکت ترین کے مطابق اگر ہم اس منصوبے میں اسمیلٹر لگاکر خام مال (Ore)سے تانبہ اور سونا نکال کر ایکسپورٹ کریں تو اس کی قیمت 40 ارب ڈالر کی بجائے 500 ارب ڈالر بنتی ہے۔ بین الاقوامی جوائنٹ وینچر کمپنی سے جب وزیر خزانہ شوکت ترین نے اس منصوبے میں اسمیلٹر لگانے کے لئے کہا تو کمپنی کے حکام نے معاہدے کی رو سے انکار کردیا اور کہا کہ ”ہمارا کام صرف کان سازی کرنا ہے ۔“دراصل ان کے انکار کی اصل وجہ 460 ارب ڈالر کے منافع کو ہڑپ کرنا تھا۔
مجھے اس بات پر بھی تعجب ہے کہ پاکستان کے دنیا کے پانچویں بڑے تانبے اور سونے کے ذخائر کی قومی دولت کو حاصل کرنے کے لئے کسی دوسری بین الاقوامی کمپنی کے ساتھ اسمیلٹرکیوں نہیں لگائے۔ پاکستان کے دوسرے بڑے معدنی منصوبے سیندک سے حکومت نے 2005ء سے لے کر 2009ء تک کل ایک لاکھ 27 ہزار ٹن معدنیات حاصل کی ہیں جس میں 85 ہزار 240 ٹن تانبہ، 7.93 ٹن سونا، 10.32 ٹن چاندی اور 41 ہزار 944 ٹن مقناطیسی لوہے کی پیداوارشامل ہے جن کی مالیت 62 کروڑ 88 لاکھ ڈالر بنتی ہے۔ اسی طرح پاکستان کے دوسرے بڑے معدنی منصوبے سیندک (Saindak) میں بھی ہمیں اسمیلٹر لگانا چاہئے تاکہ ہم اپنی معدنی دولت کو کوڑیوں کے داموں بین الاقوامی کمپنیوں کو بیچنے کے بجائے ملک کیلئے کئی سو گنا زیادہ زرمبادلہ حاصل کرسکیں جس کی ملک کو اشد ضرورت ہے اور یہی وجہ ہے کہ بلوچستان جو پاکستان کا سب سے زیادہ معدنی وسائل جس میں گیس، تیل، سونا، تانبہ شامل ہیں رکھنے والا صوبہ ہے پر بھارت سمیت دیگر ملک دشمن عناصر کی نظر ہے اور وہ بلوچستان میں دراندازی کرکے اپنے ناپاک عزائم حاصل کرنا چاہتے ہیں۔